Raunaq Raza
na jaane kaun sa manzar nazar se guzra tha
ki muddaton koi sauda-e-sar se guzra tha
phir is ke ba.ad ana ka shikar ho baiTha
main ek baar tiri rah-guzar se guzra tha
basi hui hai mahak tere pairahan jaisi
abhi abhi koi jhonka udhar se guzra tha
guzar saka na tire zabt ke hisar se jo
vo sail-e-gham bhi miri chashm-e-tar se guzra tha
thake thake se vo baazu vo fat.h-mand ankhen
safar tavil koi bal-o-par se guzra tha
main naqd-e-jan liye baiTha raha magar ‘raunaq’
na jaane dushman-e-jani kidhar se guzra tha
Leave a Reply