Aziz Hamid Madni
ji hai bahut udaas tabi.at hazin bahut
saaqi ko pyala-e-mai-e-atishin bahut
do gaz zamin fareb-e-vatan ke liye mili
vaise to asman bhi bahut hain zamin bahut
aisi bhi is hava men hai ik kafiri ki rau
bujh bujh ga.e hain shola-e-iman-o-din bahut
be-bakiyon men fard bahut thi vo chashm-e-naz
dil ki harif ho ke uThi sharm-gin bahut
paikar-e-ḳhair-o-shar se guzar aa.i zindagi
teri vafa ka daur tha ahd-afrin bahut
fariyad thi chakida-e-ḳhun-e-gulu tamam
naghma bhi ham-safir tha kar-e-hazin bahut
ai dil tujhi pe ḳhatm nahin dastan-e-ishq
afsana-ḳhvan mile mizha o astin bahut
aisi hava men ghar se nikalne ki ja na thi
varna tamam baat ka aata yaqin bahut
ai inqalab-e-rang tabi.at sambhalna
ham bhi uThe hain bazm se ab ke hazin bahut
Leave a Reply