Sehr Ishqabadi
rang uḌ kar raunaq-e-tasvir aadhi rah ga.i
gham ghalat karne ki ye tadbir aadhi rah ga.i
dekhne valon ki ankhon se nihan ik ruḳh raha
puuri khinch kar bhi miri tasvir aadhi rah ga.i
mujh se mi.ad-e-asiri kya karoge puchh kar
dida-var ho janch lo zanjir aadhi rah ga.i
hosh tha vahshat men to sahra-navardi ka mujhe
be-ḳhudi men gardish-e-taqdir aadhi rah ga.i
kahte hain is men hai saz-e-husn par hai soz-e-ishq
dekh kar gul-bang qadr-e-mir aadhi rah ga.i
nim-baz ankhon ke qurban yuun kanakhiyon se na dekh
ochhe varon se zad-e-har-tir aadhi rah ga.i
vo sarapa husn hai aur us ka ik ruḳh hai siyah
chand se mahbub ki tabir aadhi rah ga.i
jab javani josh par aa.i to vo ruḳhsat hue
zindagi ke qasr ki ta.amir aadhi rah ga.i
ghaur se fitrat ne dekha ba.ad-e-taḳhliq-e-huzur
do jahan ke husn ki taḳhmir aadhi rah ga.i
‘sehr’ un ki lantarani sun ke gosh-e-hosh se
arzu-e-ashiq-e-dilgir aadhi rah ga.i
Leave a Reply