Nabeel Ahmad Nabeel
hai jo bigḌi hui surat miri bimari ki
pyaar men mujh se kisi shaḳhs ne ghaddari ki
har taraf ḳhun-ḳharaba kiya logon ne bapa
sher taḳhliq kiye main ne ghazal jaari ki
har-nafas siine men patthar ki tarah lagta hai
zindagi mujh pe sitam-kesh ne yuun bhari ki
ye alag baat ki har lahza pareshan main huun
main ne sachcha.i ki is par bhi taraf-dari ki
main ne har baar haqiqat ki nazar se dekha
us ne har baar mire saath adakari ki
phuul ki misl mahak uTThega qarya qarya
apne is des ki jab ham ne kaman-dari ki
qafile valon ko manzil na mili barson se
ye bhi ḳhubi hai tiri qafila-salari ki
zindagi apne bharose pe guzari main ne
varis-e-taḳht ne kab meri nigah-dari ki
is se badlega mire shahr ka saara manzar
lahar jo uTThi mire shahr men bedari ki
rashk aata hai hamen apne muqaddar pe ‘nabil’
al-e-ahmad ki sada ham ne aza-dari ki
Leave a Reply