Tufan Tham Chuka Hai Magar Jagte Raho

Saghar Mehdi

tufan tham chuka hai magar jagte raho

kis vaqt ki hai kis ko ḳhabar jagte raho

sho.ale bujha ke ham-safaro mutma.in na ho

poshida raakh men hai sharar jagte raho

ab raushni men bhi hai andheron ka makr-o-fan

kya e’tibar-e-sham-o-sahar jagte raho

har zarra-e-chaman men hai la.al-o-guhar ka rang

luTne na paa.en la.al-o-guhar jagte raho

ab raat ḳhud hai apni siyahi se be-qarar

avaz de rahi hai sahar jagte raho

‘saghar’ ye gham ki raat ye rahon ke pech-o-ḳham

dushman bhi hai sharik-e-safar jagte raho