darūn-e-dil jo charāġh jalte rahe musalsal
haiñ un se āñkhoñ meñ nuur ke silsile musalsal
kahīñ pe marte haiñ bhuuk se kuchh yatīm bachche
kahīñ pe kaase haiñ sā.iloñ ke bhare musalsal
mirī udāsī pe is tarah tū udaas mat ho
ki zaḳhm rahte nahīñ haiñ aksar hare musalsal
vo ḳhvāb āñkhoñ meñ bhar sake yā unheñ gañvā de
vo apne Dar pe to baat khul kar kare musalsal
kabhī ḳhushī meñ bhī ashk āñkhoñ meñ aa ga.e aur
kahīñ udāsī meñ muskurānā paḌe musalsal
ye us kī zid meñ ‘an.amatā’ nīñdoñ se laḌ paḌī thiiñ
ham apnī āñkhoñ se der tak shab laḌe musalsal