darun-e-dil jo charagh jalte rahe musalsal
hain un se ankhon men nuur ke silsile musalsal
kahin pe marte hain bhuuk se kuchh yatim bachche
kahin pe kaase hain sa.ilon ke bhare musalsal
miri udasi pe is tarah tu udaas mat ho
ki zaḳhm rahte nahin hain aksar hare musalsal
vo ḳhvab ankhon men bhar sake ya unhen ganva de
vo apne Dar pe to baat khul kar kare musalsal
kabhi ḳhushi men bhi ashk ankhon men aa ga.e aur
kahin udasi men muskurana paḌe musalsal
ye us ki zid men ‘an.amata’ nindon se laḌ paḌi thiin
ham apni ankhon se der tak shab laḌe musalsal
Leave a Reply