Nadeem Sirsivi
surur se aTe hue ai mausam-e-visal ruk
mile darida-qalb ko sukun-e-indimal ruk
ai hairat-e-gulab-ruḳh tu itna la-javab hai
ki kah uThe saval se hamare lab saval ruk
tujhe gila hai ab vo lazzaten rahin na qurbaten
main Dalta huun raqs-e-ishq men abhi dhamal ruk
na raas aa.ega koi na dil ko bha.ega koi
hamare bin Dasega tujh ko umr-bhar malal ruk
paḌega ran aziyyaton ka samt-e-shahr-e-hijr roz
udhar na ja Thahar zara tu dekh mera haal ruk
main tere hasb-e-idda.a nahin huun vo jo tha kabhi
vo tha bhi lauT aa.ega ai mere ham-ḳhayal ruk
ghazal-taraziyan miri nigah-e-naz se tiri
ye kar rahi hain iltija na ja mire ghazal ruk
havas kho chuke hain sab hua ‘nadim’ jan-balab
tu ab na mere samne aa hasil-e-jamal ruk
Leave a Reply