Kisi Ki Kisi Ko Mohabbat Nahin Hai

Poet

kisi ki kisi ko mohabbat nahin hai

abhi is ki duniya ko lazzat nahin hai

agar tum ko milne ki fursat nahin hai

mujhe bhi ziyada zarurat nahin hai

bahut khushnuma hai gulistan-e-alam

magar sair karne ki fursat nahin hai

bahut se gharon men khazane hain madfun

nahin hai to ganj-e-qanaat nahin hai

kahan tak na behosh-o-be-khud karegi

mai-e-vasl hai koi sharbat nahin hai

khayalat men apne huun gharq vaaiz

mujhe kahne sunne ki fursat nahin hai

dikhate nahin sharm se ru-e-raushan

koi kamyabi ki surat nahin hai

tazalzul men kis vaste hai zamana

shab-e-hijr hai ye qayamat nahin hai

kahan ai pari tu kahan hur-e-jannat

tiri us ki aapas men nisbat nahin hai

miri qumriyon ke siva kaun insan

ye shamshad hai is ki qamat nahin hai

vo utthe to lakhon hi fitne uthenge

vo qamat bhi kam-az-qayamat nahin hai

na kyuun dil lage yaan vo hai aur khalvat

ye huura nahin hai ye jannat nahin hai

jafaen na kiije na kiije na kiije

tahammul ki ab mujh ko taqat nahin hai

talatum men masruf hai qatra qatra

koi shai yahan be-haqiqat nahin hai

jahan tak bane tum se be-dad kar lo

agar aane vaali qayamat nahin hai

larazta hai kyuun dar se ai jism-e-laghar

ye dhadka hai dil ka qayamat nahin hai

hasinon ki chahat hasinon ki ulfat

musibat bhi hai aur musibat nahin hai

tumhen ashiq aur mujh ko maashuq lakhon

yahan adamiyyon ki qillat nahin hai

sambhal kar zara naz-o-aghmaz kiije

hasinon ki duniya men qillat nahin hai

zamane men hone ko sab kuchh hai ‘parvin’

hamen kya umid-e-shafaat nahin hai