Hasan Naim
bayan-e-shauq bana harf-e-iztirab bana
vo ik saval ki jis ka na kuchh javab bana
main ek baab tha afsana-e-vafa ka magar
tumhari bazm se uTTha to ik kitab bana
mujhe safir bana apna ku-ba-ku ai ishq
kise havas hai ki duniya men kamyab bana
main jis ḳhayal ko apna junun samajhta tha
vahi ḳhayal zamane ka husn-e-ḳhvab bana
kabhi to vaj.h-e-karam ban ga.i hai ḳhuddari
kabhi niyaz-talab baa.is itaab bana
sara-e-dil men jagah de to kaaT luun ik raat
nahin ye shart ki mujh ko sharik-e-ḳhvab bana
jo ek daagh ki surat raha shab-e-ummid
nujum-e-dil men vahi dard aftab bana
mujhe na ḳhaak men milne de ai gham-e-pinhan
jo ban sakun to mujhe naqsh-e-la-javab bana
mizha se qatra ḳhushi men chhalak raha tha magar
sukut-e-lab se tire mauj-e-iztirab bana
bane hain ḳhvab ke jhonke nasim-e-ḳhuld-nashin
suluk-e-dahr jahan atish-e-azab bana
bahut qarib se dekha to kho ga.e jalve
nazar hi parda bani husn hi hijab bana
jo mere dasht-e-junun men tha farq-e-ru-e-bahar
vahi ḳhirad ke ḳharabe men ik gulab bana
amir-e-charḳh ka ehsan nahin hai mujh pe ‘na.im’
mujhe hai naaz ki zarre se aftab bana
Leave a Reply