Kaise kaTe Qasida-Go Harf-Garon Ke Darmiyan

Razi Akhtar Shauq

kaise kaTe qasida-go harf-garon ke darmiyan

koi to sar-kashida ho itne saron ke darmiyan

ek to shaam rang rang phir mire ḳhvab rang rang

aag si hai lagi hui mere paron ke darmiyan

haath liye hain haath men phir bhi nazar hai ghaat men

ham-safaron ki ḳhair ho ham-safaron ke darmiyan

ab jo chale to ye khula shahr kushada ho gaya

baḌh ga.e aur fasle ghar se gharon ke darmiyan

kaise uḌuun main kya uḌuun jab koi kashmakash si ho

mere hi bazuon men aur mere paron ke darmiyan

jam-e-sifal-o-jam-e-jam kuchh bhi to ham na ban sake

aur bikhar bikhar ga.e kuza-garon ke darmiyan

jaise luTa tha ‘shauq’ men yunhi mata-e-fan luTi

ahl-e-nazar ke samne dida-varon ke darmiyan