but-parasti ne kiya ashiq-e-yazdan mujh ko
parda-e-kufr men hasil hua iman mujh ko
jab talak zulf-e-ruḳh-e-yar ka divana raha
piir samjha kiye hindu-o-musalman mujh ko
chahiye pairahan-e-daman-e-tegh o qatil
tere ḳhanjar ka hai darkar gareban mujh ko
ab dar-andazi-e-aghyar nahin chal sakti
ḳhuub pahchante hain yaar ke darban mujh ko
sharm-e-iza se mire dil ko yaqin hai ai maut
munh na dikhla.egi sub.h-e-shab-e-hijran mujh ko
ḳhal-e-ruḳh ḳhizr-e-rah-e-kufr na hota jo tira
daam men la hi chuke the ye musalman mujh ko
chashm-e-ḳhun-ḳhvar ka aghosh-e-mizha men hai ye qaul
zeb hai kahiye agar sher-e-niystan mujh ko
jis men kuchh hoti hai ummid-e-visal-e-mahbub
itni khalti nahin vo gardish-e-dauran mujh ko
ye na ma.alum tha is rang se aa.egi bahar
tauba-e-mai ne kiya saḳht pasheman mujh ko
ishq ne mansab-e-ushshaq jo taqsim kiye
baagh bulbul ko diya kucha-e-janan mujh ko
sozish-e-dil se ye parvane ki surat taḌpa
dekh kar rone lagi sham-e-shabistan mujh ko
mujh giran-bar ke mahshar men tulen jab a.amal
na subuk kijiyo ai palla-e-mizan mujh ko
kaun andesha-e-farda ka malal aaj kare
mausam-e-gul men nahin fikr-e-zamistan mujh ko
tere hote hue ai ghairat-e-ḳhurshid na luun
khoTe damon bhi mile gar mah-e-kan.an mujh ko
saf-kashi apni dikhata hai mujhe kya ashrar
yaad hai us ki saf-ara.i-e-mizhgan mujh ko
lab-e-jan-baḳhsh sanam ka huun jo ashiq to log
jante hain ḳhizar-e-chashma-e-haivan mujh ko
na-tavan vo huun ajab kya sifat pa-e-malaḳh
mor le jaa.e agar pesh-e-sulaiman mujh ko
mere zulmat-kade men laa.en jo raushan kar ke
kirm-e-shab aa.e nazar sham-e-shabistan mujh ko
sadd-e-bab ab mira aghyar abas karte hain
nik.hat gul huun nahin kuchh gham-e-darban mujh ko
dil-jala main huun vo ashiq ki shab-e-hijr ‘qalaq’
sham.a bhi rone lagi dekh gareban mujh ko
Leave a Reply