Ismail Merathi
pa-e-ghair aur mera sar dekho
tuut jaae na sang-e-dar dekho
ek aalam pada hai chakkar men
gardish-e-chashm-e-fitna-gar dekho
main nazar-band ghair madd-e-nazar
apna dil aur mira jigar dekho
chashm pur-nam hai tan ghubar-alud
aan kar sair-e-bahr-o-bar dekho
fikr-e-ifsha-e-raz kyuun na karun
kya haya-khez hai nazar dekho
hai digar-gun mariz-e-gham ka haal
ho sake to dava bhi kar dekho
ghair jhalte hain ab unhen pankha
asar-e-ah-e-pur-sharar dekho
kam-numai-o-kheshtan-bini
kitne be-did ho idhar dekho
Leave a Reply