sab ko rusva baari baari kiya karo
har mausam men fatve jaari kiya karo
raton ka nindon se rishta tuut chuka
apne ghar ki pahre-dari kiya karo
qatra qatra shabnam gin kar kya hoga
dariyaon ki daave-dari kiya karo
roz qaside likkho gunge bahron ke
fursat ho to ye begari kiya karo
shab bhar aane vaale din ke khvab buno
din bhar fikr-e-shab-bedari kiya karo
chand ziyada raushan hai to rahne do
jugnu-bhayya ji mat bhari kiya karo
jab ji chahe maut bichha do basti men
lekin baten pyari pyari kiya karo
raat badan-dariya men roz utarti hai
is kashti men khuub savari kiya karo
roz vahi ik koshish zinda rahne ki
marne ki bhi kuchh tayyari kiya karo
khvab lapete sote rahna thiik nahin
fursat ho to shab-bedari kiya karo
kaghaz ko sab saunp diya ye thiik nahin
sher kabhi khud par bhi taari kiya karo
Leave a Reply