Tariq Qamar
apni palkon ke shabistan men rakkha hai tumhen
tum sahifa ho so juzdan men rakkha hai tumhen
saath hone ke yaqin men bhi mire saath ho tum
aur na hone ke bhi imkan men rakkha hai tumhen
ek kam-zarf ke saa.e se bhali hai ye dhuup
tum samajhte ho ki nuqsan men rakkha hai tumhen
jitne aansu hain sabhi nazr kiye hain tum ko
ham ne har sher ke vijdan men rakkha hai tumhen
dil to divana hai apna hi use hosh nahin
is liye dil men nahin jaan men rakkha hai tumhen
mere zaḳhmon ka sabab puchhegi duniya tum se
main ne har zaḳhm ki pahchan men rakkha hai tumhen
Leave a Reply