un ko rusva mujhe ḳharab na kar
ai dil itna bhi iztirab na kar
amad-e-yar ki ummid na chhoḌ
dekh ai aankh mail-e-ḳhvab na kar
mil hi rahti hai mai-parast ko mai
fikr-e-na-yabi-e-sharab na kar
naseha ham karenge sharh-e-junun
dil-e-divana se ḳhitab na kar
shauq yaron ka be-shumar nahin
sitam ai dost be-hisab na kar
dil ko mast-e-ḳhayal-e-yar bana
lab ko aluda-e-sharab na kar
rakh bahar-hal shughl-e-mai ‘hasrat’
is men parva-e-sheḳh-o-shab na kar
Leave a Reply