Haidar Ali Aatish
surat se is ki behtar surat nahin hai koi
didar-e-yar si bhi daulat nahin hai koi
ankhon ko khol agar tu didar ka hai bhuka
chaudah tabaq se bahar ne.amat nahin hai koi
sabit tire dahan ko kya mantiqi karenge
aisi dalil aisi hujjat nahin hai koi
ye kya samajh ke kaḌve hote hain aap ham se
pi ja.ega kisi ko sharbat nahin hai koi
main ne kaha kabhi to tashrif laao bole
ma.azur rakhiye vaqt-e-fursat nahin hai koi
ham kya kahen kisi se kya hai tariq apna
maz.hab nahin hai koi millat nahin hai koi
dil le ke jaan ke bhi saa.il jo ho to hazir
hazir jo kuchh hai us men hujjat nahin hai koi
ham sha.eron ka halqa halqa hai arifon ka
na-ashna-e-ma.ani surat nahin hai koi
divanon se hai apne ye qaul us pari ka
ḳhaki o atishi se nisbat nahin hai koi
hazhda hazar aalam dam-bhar raha hai tera
tujh ko na chahe aisi ḳhilqat nahin hai koi
nazan na husn par ho mehman hai chaar din ka
be-e’tibar aisi daulat nahin hai koi
jaan se aziiz dil ko rakhta huun aadmi huun
kyun-kar kahun main mujh ko hasrat nahin hai koi
yuun bad kaha karo tum yuun maal kuchh na samjho
ham sa bhi ḳhair-ḳhvah-e-daulat nahin hai koi
main panch vaqt sajda karta huun is sanam ko
mujh ko bhi aisi-vaisi ḳhidmat nahin hai koi
ma-o-shuma kah-o-mah karta hai zikr tera
is dastan se ḳhali sohbat nahin hai koi
shahr-e-butan hai ‘atish’ allah ko karo yaad
kis ko pukarte ho hazrat nahin hai koi
Leave a Reply