na tirgi ke liye hain na raushni ke liye
shab-o-sahar ke taqaze hain bandagi ke liye
hamara ḳhuun bhi hazir hai ai ḳhirad-mando
tumhare daur ki be-kaif zindagi ke liye
savad-e-sham to hai aam bazm-e-fitrat men
magar tulu-e-sahar hai kisi kisi ke liye
rah-e-talab men andheron ko kosne vaalo
kisi ne dil bhi jalaya hai raushni ke liye
kuchh aa.ine bhi tiri anjuman men TuuTe hain
tire labon ke tabassum tiri ḳhushi ke liye
faqih-e-shahr se mera salam kah dena
ki zindagi bhi ibadat hai zindagi ke liye
rida-e-bint-e-inab ban ga.i bisat-e-nujub
ye ehtimam hai ‘raje’ kis aadmi ke liye
Leave a Reply