akhirul-amr tiri samt safar karte hain
aaj is nakhl-e-masafat ko shajar karte hain
jo hai abad tiri aina-samani se
ham isi khana-e-hairat men basar karte hain
dil to vo pet ka halka hai ki bas kuchh na kaho
apni halat se kab aison ko khabar karte hain
vasl aur hijr hain donon hi miyan se baiat
dekhiye kis pe inayat ki nazar karte hain
dil ne kuchh zor dikhaya to ye sunna ik din
ham bhi alvand-e-gham-e-yar ko sar karte hain
tum ko to diin ki bhi fikr hai duniya ki bhi
bhaai ham to yunhi bekar basar karte hain
Leave a Reply