Aql Har Baat Pe Hairan Hai Ise Kya Kahiye

Shahzad Ahmad

aql har baat pe hairan hai ise kya kahiye

dil bahr haal pareshan hai ise kya kahiye

bulbulen taqat-e-guftar se mahrum huiin

ab ye a.in-e-gulistan hai ise kya kahiye

log kahte hain ki gulshan men bahar aa.i hai

bu-e-gul phir bhi pareshan hai ise kya kahiye

rahnuma duur bahut duur nikal aa.e hain

qafila raah men hairan hai ise kya kahiye

arzuon ne ka.i phuul chune the lekin

zindagi ḳhar-badaman hai ise kya kahiye

apne maazi ki hikayat bahut ḳhuub sahi

ab na.e daur ka saman hai ise kya kahiye

sochte the ki sahar nur-badaman hogi

tirgi phir bhi numayan hai ise kya kahiye

ehtimam-e-sahar-e-nau to karenge lekin

dil abhi be-sar-o-saman hai ise kya kahiye

main ne kis haal men dekha hai chaman ko ‘shahzad’

aur dil ab bhi ghazal-ḳhvan hai ise kya kahiye