Amardeep Singh
sub.h-dam hai ye tabi.at kaisi
ḳhair udasi se shikayat kaisi
kya koi ḳhvab abhi dekha tha
aankh malti hai haqiqat kaisi
dil ne ik vasl-e-musalsal pa kar
talḳh kar li hai mohabbat kaisi
be-dhaḌak dil ko dukhaya kiije
is inayat ki ijazat kaisi
yaad aata hai ḳhuda pal pal pal
aisi halat men ibadat kaisi
ḳhud se do-char hua karte hain
ham ko fursat men faraghat kaisi
dil se utra hua hai kyuun dil bhi
aisi baton ki vazahat kaisi
ḳhud se mansub kiya kya kya kuchh
sha.iri men hai suhulat kaisi
ahl-e-dil aql ke dushman Thahre
ham ko ai dost nasihat kaisi
zindagi ḳhud men ‘amar’ ḳhush thi bahut
maut ne kar di shararat kaisi
Leave a Reply