andhere din ki safarat ko aa.e hain ab ke
hain kitni raushaniyan ishtihar men shab ke
yahan to dekh liye ham ne hausle sab ke
mile na dost na dushman hi apne mansab ke
bas ek baat pe nakamiyon ne gher liya
zaban se aa.e labon tak na harf matlab ke
jo lab-kushada the vo mudda.i bane lekin
jo dil-kushada the vo kaam aa ga.e sab ke
ik ah-e-ḳhushk hi apne nasib men nikli
bahut hi shor sune jazba-e-laba-lab ke
juda.iyan to muqaddar hain lekin ik gham-e-hijr
ajiib phuul se sathi bikhar ga.e ab ke
bhaTak raha hai dayar-e-ḳhirad men kyuun gham-e-dil
gharon ko lauT chuke saare ba-vafa kab ke
zamin-e-saḳht men lafzon ke gul khila.e hain
ghazal kahi to hue qaa.il apne kartab ke
hazar us ne bhi chakkar diye magar ‘baqar’
rahe na ham bhi kabhi asman se dab ke
Leave a Reply