Shakeel Haidar
ab nahin hoti hai tanha.i pe hairani mujhe
raas aati ja rahi hai dil ki virani mujhe
tesha-e-gham se tarashi ja rahi hai zindagi
rafta rafta mil rahi hai shakl-e-insani mujhe
taziyane dard ke lagte rahenge umr bhar
de ga.i kaisi saza.en dil ki nadani mujhe
sargiran jab tak raha main sahab-e-dastar tha
bechti phirti hai ab ye meri arzani mujhe
hain ajal aur zindagi ke darmiyan do hi qadam
fasla lagta hai ye bhi kitna tulani mujhe
naḳhuda hairat-ba-daman dekhta hi rah gaya
le ga.i sahil se aa ke mauj-e-tufani mujhe
ik sukun ka saans lene ka tavaqquf mil sake
kaash ho jaa.e dukhon men itni asani mujhe
haath phailate rahe saare zamane men ‘shakil’
dar-ba-dar le kar phiri hai tang-damani mujhe
Leave a Reply