tai kar chuke ye zindagi-e-javedan se ham
aage baḌhenge aur uThe hain jahan se ham
kis ko sada den kis se kahen saath le chalo
pichhe rahe ghubar-e-rah-e-karvan se ham
dil men jo dard hai vo nigahon se hai ayaan
ye baat aur hai na kahen kuchh zaban se ham
chaunka diya qafas ne hamen gahri niind se
vabasta ho chale the bahut ashiyan se ham
gar aa bhi jaa.e meri jabin tak vo astan
la.enge sajda-rezi ki aadat kahan se ham
faiz-e-junun se fursat-e-fariyad hi na thi
na-ashna hi rah ga.e tarz-e-fughan se ham
dekhi hain ham ne un ki pashiman-nigahiyan
kahna ho laakh phir bhi kahen kis zaban se ham
Leave a Reply