Poet
jan-ba-lab hasrat-o-arman pe rona aaya
mehrban aap ke ehsan pe rona aaya
ḳhana-e-be-sar-o-saman pe rona aaya
ghar men aa.e hue mehman pe rona aaya
phuul bhi daman-e-fitrat men the angare bhi
aankh vaale tiri pahchan pe rona aaya
ghar ke luTne ka mujhe gham nahin lekin ai dost
kotah-andesh nigahban pe rona aaya
bada-e-nab ki aur apne ḳhumistan men kami
pir-e-mai-ḳhana ke elaan pe rona aaya
kis ke ghar ja.ega sailab-e-bala mere ba.ad
duur tak soch ke tufan pe rona aaya
sust-raftari-e-ushtur to koi baat nahin
past-ahang-e-hudi-ḳhvan pe rona aaya
dair se rabt haram se bhi ta.alluq kya ḳhuub
is lachakte hue iman pe rona aaya
iltifat-e-nigah-e-naz mire dost baja
apni barbadi ke imkan pe rona aaya
dushman-e-tauba ghaTaon ka gila kya ‘faruq’
Dagmagate hue iman pe rona aaya
Leave a Reply