kaise rafu hon chak-e-gareban main bhi sochun tu bhi soch
apne apne dard ka darman main bhi sochun tu bhi soch
jis ke liye ik umr se lambi kaaTi ham ne kaali raat
sub.h vo kyuun hai sham-ba-daman main bhi sochun tu bhi soch
mere lahu se naqsh hui hai meri hi tasvir magar
kis ka hai ye shauq-e-nigaran main bhi sochun tu bhi soch
roz-afzun hai meri tamanna aur tira begana-pan
is be-rabt si nazm ka unvan main bhi sochun tu bhi soch
zaḳhmon ke ḳhun-rang ujale mujh ko hi marghub sahi
kaun hai in zaḳhmon men farozan main bhi sochun tu bhi soch
ghar ki munDeron tak barpa hai divali ka saara jashn
kaise ho andar bhi charaghan main bhi sochun tu bhi soch
dil ne bhi thak-har ke aḳhir dar-darvaze band kiye
kaun ho ab is gham ka nigahban main bhi sochun tu bhi soch
un ke aage phaila hua tha dast-e-tamanna ai ‘asrar’
ya ki tah-e-ḳhanjar thi rag-e-jan main bhi sochun tu bhi soch
Leave a Reply