akhtar-ansari

Har Waqt Nauha-Khwan Si Rahti Hain Meri Aankhen

har vaqt nauha-ḳhvan si rahti hain meri ankhen

ik dukh bhari kahani kahti hain meri ankhen

jazbat-e-dil ki shiddat sahti hain meri ankhen

gul-rang aur shafaq-gun rahti hain meri ankhen

aish o tarab ke jalse dard o alam ke manzar

kya kuchh na ham ne dekha kahti hain meri ankhen

jab se dil o jigar ki hamdard ban gai hain

ghamginiyon men duubi rahti hain meri ankhen

labrez ho ke dil ka saghar chhalak uTha hai

shayad isi sabab se bahti hain meri ankhen

har jumbish-e-nazar hai rudad-e-ishq ‘aḳhtar’

hain be-zaban magar kuchh kahti hain meri ankhen

More Poems

Leave a Comment