Iqbal Sajid
us aa.ine men dekhna hairat bhi aa.egi
ik roz mujh pe us ki tabi.at bhi aa.egi
qadghan laga na ashkon pe yadon ke shahr men
hoga agar tamasha to ḳhilqat bhi aa.egi
main aa.ina banunga tu patthar uTha.ega
ik din khuli saḌak pe ye naubat bhi aa.egi
mausam agar hai sard to phir aag taap le
chamkegi aankh ḳhuun men hararat bhi aa.egi
kuchh der aur shaḳh pe rahne de sabr kar
pakne de phal ko khane men lazzat bhi aa.egi
ankhen hain tere paas to phir sat.h-e-ab par
gahra.i se ubhar ke ibarat bhi aa.egi
niklen charagh haath men le kar gharon se log
suraj ki rah men manzil-e-zulmat bhi aa.egi
ye janta to kaTta ‘sajid’ na saa.e ko
talvar par lahu ki tamazat bhi aa.egi
Leave a Reply