tum is ḳharabe men chaar chhe din Tahal ga.i ho
so ain-mumkin hai dil ki halat badal ga.i ho
tamam din is dua men kaTta hai kuchh dinon se
main ja.un kamre men to udasi nikal ga.i ho
kisi ke aane pe aise halchal hui hai mujh men
ḳhamosh jangal men jaise banduq chal ga.i ho
ye na ho gar main hilun to girne lage burada
dukhon ki dimak badan ki lakḌi nigal ga.i ho
ye chhoTe chhoTe ka.i havadis jo ho rahe hain
kisi ke sar se baḌi musibat na Tal ga.i ho
hamara malba hamare qadmon men aa gira hai
plate men jaise mom-batti pighal ga.i ho
Leave a Reply