Nida Fazli

Har Ghadi Khud Se Ulajhna Hai Muqaddar Mera

har ghadi khud se ulajhna hai muqaddar mera

main hi kashti huun mujhi men hai samundar mera

kis se puchhun ki kahan gum huun kai barson se

har jagah DhunDhta phirta hai mujhe ghar mera

ek se ho gae mausamon ke chehre saare

meri ankhon se kahin kho gaya manzar mera

muddaten biit gaiin khvab suhana dekhe

jagta rahta hai har niind men bistar mera

aaina dekh ke nikla tha main ghar se bahar

aaj tak haath men mahfuz hai patthar mera

Leave a Comment