gham-e-hayat ko apnao zindagi kar lo
ab ankhen khol do ik pal ko raushni kar lo
ghamon ke daur men tum ko agar hai ḳhush rahna
to muskurao zara dard men kami kar lo
main is sahare tamam umr kaaT sakta huun
nazar se chhu ke mire ḳhat ko surma.i kar lo
kise ḳhabar hai ki baaqi hai zindagi kab tak
ye mashvara hai ki ab mujh se dosti kar lo
ik ajnabi se sune main ne tazkire apne
ab is se achchha hai charcha gali gali kar lo
tum apni zaat ko mahsus kar na paoge
tum apni zaat se mujh ko agar nafi kar lo
bhaTak rahe ho udasi ke dasht men ‘afaq’
tumhen ye kis ne kaha tha ki ashiqi kar lo
Leave a Reply