nahin roze se hain to kya adakari to karni hai
amir-e-shahr ki davat hai iftari to karni hai
kahan hai shervani aur Topi la.iye begam
abhi din hai magar pahle se tayyari to karni hai
abhi baaqi hai kuchh logon men jo iman-dari ki
kisi bhi tarah se vo duur bimari to karni hai
kisi bhi tarah rishvat de ke pakki naukri kar lo
miyan duty tumhen le de ke sarkari to karni hai
jahan par lomḌi ki tarah har chehra nazar aa.e
vahan thoḌi bahut ham ko bhi ayyari to karni hai
agar insaf bhi majruh hota hai to hone do
hamen apne qabile ki taraf-dari to karni hai
mire malik mire aaqa main banda aap ka lekin
mila hai hukm uupar se giraftari to karni hai
Leave a Reply