kuchh khabar laai to hai bad-e-bahari us ki
shayad is raah se guzregi savari us ki
mera chehra hai faqat us ki nazar se raushan
aur baaqi jo hai mazmun-nigari us ki
aankh utha kar jo ravadar na tha dekhne ka
vahi dil karta hai ab minnat o zaari us ki
raat ki aankh men hain halke gulabi Dore
niind se palken hui jaati hain bhari us ki
us ke darbar men hazir hua ye dil aur phir
dekhne vaali thi kuchh kar-guzari us ki
aaj to us pe thaharti hi na thi aankh zara
us ke jaate hi nazar main ne utari us ki
arsa-e-khvab men rahna hai ki laut aana hai
faisla karne ki is baar hai baari us ki