Obaidur Rahman
pahle kuchh din mire zaḳhmon ki numa.ish hogi
phir mire haal pe us but ki navazish hogi
haan ba-zahir to dhara ja.ega qatil lekin
pas-e-parda usi qatil ki sifarish hogi
pyasi dharti yunhi pyasi hi rahegi yaaro
aur dariya pe musalsal yahan barish hogi
jis tarah TuuTe hue patte bikhar jaate hain
ham bikhar jaa.en usi taur ye sazish hogi
kis ko ma.alum hai jo raz-e-mashiyyat hai ‘obaid’
jaane kis baat pe kis shaḳhs ki baḳhshish hogi
Leave a Reply