but kya hain bashar kya hai ye sab silsila kya hai
phir main huun mira dil he miri ghar-e-hira hai
jo ankhon ke aage hai yaqin hai ki guman hai
jo ankhon se ojhal hai ḳhala hai ki ḳhuda hai
taare miri qismat hain ki jalte hue patthar
duniya miri jannat hai ki shaitan ki saza hai
dil dushman-e-jan hai to ḳhirad qatil-e-iman
ye kaisi balaon ko mujhe saunp diya hai
sunte rahen aram se har jhuuT to ḳhush hain
aur Tok den bhule se to kahte hain bura hai
shaitan bhi rahta hai mire dil men ḳhuda bhi
ab aap kahin dil ki sada kis ki sada hai
‘aḳhtar’ na karo un se gila jaur-o-jafa ka
apni bhi ḳhuda jaane havas hai ki vafa hai
Leave a Reply