Kaifi Azmi
ye barsat ye mausam-e-shadmani
khas-o-khar par phat padi hai javani
bhadakta hai rah rah ke soz-e-mohabbat
jhama-jham barasta hai pur-shor paani
faza jhumti hai ghata jhumti hai
darakhton ko zau barq ki chumti hai
thirakte hue abr ka jazb tauba
ki daman uthae zamin ghumti hai
kadakti hai bijli chamakti hain bunden
lapakta hai kaunda damakti hain bunden
rag-e-jan pe rah rah ke lagti hain choten
chhama-chham khala men khanakti hain bunden
falak ga raha hai zamin ga rahi hai
kaleje men har lai chubhi ja rahi hai
mujhe pa ke is mast shab men akela
ye rangin ghata tiir barsa rahi hai
chamakta hai bujhta hai tharra raha hai
bhatakne ki jugnu saza pa raha hai
abhi zehn men tha ye raushan takhayyul
faza men jo udta chala ja raha hai
lachak kar sambhalte hain jab abr-pare
baraste hain daman se dum-dar taare
machalti hai rah rah ke balon men bijli
gulabi hue ja rahe hain kinare
faza jhuum kar rang barsa rahi hai
har ik saans shoala bani ja rahi hai
kabhi is tarah yaad aati nahin thi
vo jis tarah is vaqt yaad aa rahi hai
bhala lutf kya manzar-e-pur-asar de
ki ashkon ne ankhon pe daale hain parde
kahin aur ja kar baras mast badal
khuda tera daman javahir se bhar de
Leave a Reply