Mohammad Ahmad
ja.ega dil kahan hoga yahin kahin
jab dil ka ham-nashin milta nahin kahin
yuun us ki yaad hai dil men basi hui
jaise ḳhazana ho zer-e-zamin kahin
ham ne tumhara gham dil men chhupaya hai
dekha bhi hai kabhi aisa amiin kahin
meri daraz men hai us ka ḳhat dhara
aTka hua na ho dil bhi vahin kahin
hai us ka ḳhat to bas sidha sapaT sa
haan dil-lagi bhi hai is men kahin kahin
jitna vo dil-ruba utna hi bevafa
dil ko mila hi kyon aisa hasin kahin
‘ahmad’ ye dil mira kyon hai bujha bujha
dil se ḳhafa na ho dil ka makin kahin
Leave a Reply