teri dastak ki aas darvaze
shaam se hain udaas darvaze
phir bhi bahar qadam nahin rakkha
the mire aas paas darvaze
us ke angan men ja ke khulte hain
meri qismat ke ḳhaas darvaze
koi avaz sun nahin sakta
jab ki lete hain saans darvaze
us ke ghar men ḳhamosh divaren
mere ghar men udaas darvaze
us gali ki taraf nahin jaana
hain vahan be-libas darvaze
Thiik hai band hi rakho ham par
shahr ke bad-havas darvaze
main tire dukh ko bhi samajhta huun
ai mire gham-shanas darvaze
main ne ghar men rakhe ‘sahar’ lekin
mujh ko aa.e na raas darvaze
Leave a Reply