Owais Ahmad Dauran
raunaq-e-kucha-o-bazar hain teri ankhen
log sauda hain ḳharidar hain teri ankhen
kya yunhi jazib-o-dildar hain teri ankhen
ḳhaliq-e-husn ka shahkar hain teri ankhen
ye na hotin to kisi dil men na tufan uThta
shauq-angez o fusun-kar hain teri ankhen
teri ma.asumiyat-e-dil ka pata deti hain
teri mahbubi ka iqrar hain teri ankhen
jam-o-mina ki tarah ḳhud hi chhalak jaati hain
kitni maḳhmur hain sarshar hain teri ankhen
un ki taqdis pe ho azmat-e-maryam bhi nisar
kaun kahta hai gunahgar hain teri ankhen
palken bojhal hain madhur niind ke maare lekin
jaane kya baat hai bedar hain teri ankhen
jaise savan ki ghaTa TuuT ke barse ai dost
aaj kuchh aise guhar-bar hain teri ankhen
mere mahbub-e-dil-avez bata de itna
mujh se kis shai ki talabgar hain teri ankhen
hasraten dil men liye Duub raha hai ‘dauran’
mauj-dar-mauj hain manjdhar hain teri ankhen
Leave a Reply