shahr men ban ke mohabbat ka gadagar mangun
mujh ko mange se mile vo to main dar dar mangun
dahr ki daar pe jhulun bhi to kaise jhulun
gham-e-duniya bhi tire qad ke barabar mangun
ik taraf dil ki tire gham se ubharta hi nahin
ik taraf main ki tiri diid ka gauhar mangun
teri yadon ki uḌanen bhi bahut ḳhuub magar
dil ye kahta hai tire lams ka shahpar mangun
zindagi meri hai kashkol-e-tahi ki surat
us bhikari se main mangun bhi to kya zar mangun
ek patthar tiri rahon se haTa huun jab se
aaj ye haal ki har paanv se Thokar mangun
Leave a Reply