Suroor Barabankvi
jab talak raushni-e-fikr-o-nazar baaqi hai
tirgi laakh ho imkan-e-sahar baaqi hai
kis ke jalvon ka ye ankhon men asar baaqi hai
husn baaqi hai na ab husn-e-nazar baaqi hai
ye bhi ik mo.ajiza-e-josh-e-junun hai ki nahin
pa-shikasta huun magar azm-e-safar baaqi hai
ye bhi kiya nazm-e-jahan hai ki azal se ab tak
bas vahi silsila-e-sham-o-sahar baaqi hai
aaj yuun abla-payan-e-junun guzre hain
ik charaghan sa sar-e-rah-guzar baaqi hai
main ḳhizan-dida-o-avara sahi phir bhi ‘surur’
mere naghmon men baharon ka asar baaqi hai
Leave a Reply