rabta hai abhi havaon se
ji raha huun tiri duaon se
zindagi bol kya irada hai
maut mahngi nahin davaon se
tu miri laghzishon pe tanz na kar
meri pahchan hai ḳhataon se
is ko saql-e-zamin kahte hain
lauT aaya bashar ḳhalaon se
dil ne ankhon men bhar diye aansu
le ke mayusiyan ghaTaon se
jitne ḳhana-ḳharab hain sab ko
bad-dua.en mili hain maaon se
bhiik de varna chhin le aa kar
kasa-e-did ham gadaon se
ai ḳhuda ab to bal-o-par de de
jism chhupte nahin qabaon se
ranj-o-gham hon ki hasrat-o-arman
mutma.in huun tiri ataon se
koshishen chhoḌ duun sabhi ‘nusrat’
kaam niklen agar duaon se
Leave a Reply