meri aarzu ki hudud mein ye falak nahin ye zamin nahin

Urooj Qadri

miri aarzu ki hudud men ye falak nahin ye zamin nahin

mujhe bazm-e-quds men de jagah jo vahan nahin to kahin nahin

hai jabin to asl men vo jabin ki jhuke vahan to jhuki rahe

tire astan se jo uTh ga.i vo jabin to koi jabin nahin

mire dil ki nazr qubul kar jo ishara ho to ye sar nisar

ki vafa-e-ahd ki shart men kahin darj lafz nahin nahin

ye arab bhi hai mire ru-ba-ru ye ajam bhi hai mire samne

miri justuju ko yaqin hai kahin tujh sa koi hasin nahin

tire kund teshe se rah-rau ye chaTan kaise kaTe bhala

tire haath yaḳh tire paanv shal tire dil men soz-e-yaqin nahin

ye jo bandagi hai ‘uruj’ ki tiri zindagi se hai qimti

na ho bandagi to fuzul hai koi vazn us ka kahin nahin