Ashu Mishra
chahe ghar men rok de ya rahguzar men rok de
vo jise chahe use aadhe safar men rok de
ye agar bahar ga.iin to ḳhamushi chha ja.egi
meri avazen mire divar-o-dar men rok de
naḳhuda us jal-pari ke paas pahuncha de mujhe
ya to us kashti ko le ja kar bhanvar men rok de
chand qadmon par badal jaate hain mere ham-safar
ai ḳhuda koi nazara to nazar men rok de
us ki aamad se makan-e-dil bahut shadab hai
aur kuchh din is na.e mehman ko ghar men rok de
Leave a Reply