ye to maalum ki phir aiyega
baithiye aaj kahan jaiyega
marqad-e-kushta pe jab aiyega
dil men kuchh soch ke pachhtaiyega
ham to samjhe the ki jald aiyega
khair ab puchh ke ghar jaiyega
ghair ko bose dahan ke kaise
kuchh mira munh to na khulvaiyega
mere kahne men nahin hai dil-e-zar
aap hi kuchh use samjhaiyega
ab to chuse lab-e-shirin ham ne
lo hamen ghol ke pi jaiyega
daulat-e-vasl hai qimat dil ki
aage kuchh aap bhi farmaiyega
jama khatir rahiye ai ahl-e-qubur
ham bhi aate hain na ghabraiyega
vasf likhte hain lab-e-shirin ke
kuchh mithai hamen khilvaiyega
nazaa men paas mire kyuun baithe
uthiye uthiye nahin ghabraiyega
sadma-e-hijr men taklif karen
malak-ul-maut se farmaiyega
aap par marne se hasil kya hai
fatiha bhi to na divaiyega
shaikh-ji but ki burai kiije
apne allah se bharpaiyega
kaabe men sakht-kalami sun li
but-kade men na kabhi aiyega
bose lillah ‘sakhi’ mangta hai
ek dijega to das paiyega
Leave a Reply