aankh se nikla to ik sail-e-ravan ho ja.ega
varna ehsas-e-mohabbat ra.egan ho ja.ega
ye muqayyad rah saka hai kab kisi zindan men
ishq ḳhushbu hai zamane par ayaan ho ja.ega
jism ki dahliz par dastak si hai mahtab ki
kya badan is raat mera asman ho ja.ega
umr ke ik daur men yaad aa.ega sahra ka saath
ye safar jo hai haqiqat dastan ho ja.ega
kaun jiita kaun haara hai bulandi kis ke naam
tujh pe zahir ek din nok-e-sinan ho ja.ega
umr-bhar ḳhud ko jalaya ham ne ye hi soch kar
ek din raushan hamara bhi makan ho ja.ega
saaf kah dega hikayat chehra-e-ayyar ki
aa.ina kaise kisi ka ham-zaban ho ja.ega
Leave a Reply