bana ke charon taraf ik lakir baiTha hai
ghane daraḳht ke niche faqir baiTha hai
karega kaun mohabbat yahan dobara dost
fareb-e-ishq kaleje ko chiir baiTha hai
main kaise ḳhud ko bacha paata teri nazron se
baḌa saTik nishane pe tiir baiTha hai
sabaq koi nahin deta dilon ko joḌne ka
isi malal men Duuba ‘kabir’ baiTha hai
uThegi kaise sada.en sitamgaron ke ḳhilaf
har ek shaḳhs yahan be-zamir baiTha hai
kiya hai kyon use naraz apni baton se
vo man masos ke kitna adhir baiTha hai
usi ke haath pe karni hai ishq ki bai’at
mazar-e-qais se lag kar jo piir baiTha hai
Leave a Reply