Irfan Sattar
chup hai aghaz men, phir shor-e-ajal paḌta hai
aur kahin biich men imkan ka pal paḌta hai
ek vahshat hai ki hoti hai achanak taari
ek gham hai ki yakayak hi ubal paḌta hai
yaad ka phuul mahakte hi navah-e-shab men
koi ḳhushbu se mulaqat ko chal paḌta hai
hujra-e-zat men sannaTa hi aisa hai ki dil
dhyan men gunjti aahaT pe uchhal paḌta hai
rok leta hai abad vaqt ke us paar ki raah
dusri samt se ja.un to azal paḌta hai
sa.aton ki yahi takrar hai jaari har-dam
meri duniya men koi aaj, na kal paḌta hai
tab-e-yak-lahza kahan husn-e-junun-ḳhez ke pesh
saans lene se tavajjoh men ḳhalal paḌta hai
mujh men phaili hui tariki se ghabra ke koi
raushni dekh ke mujh men se nikal paḌta hai
jab bhi lagta hai suḳhan ki na koi lau hai na rau
daf.atan harf koi ḳhuun men machal paḌta hai
gham chhupa.e nahin chhupta hai karun kya ‘irfan’
naam luun us ka to avaz men bal paḌta hai
Leave a Reply