Sahba Akhtar
main ahl-e-dahr ki nazron men be-aqida sahi
ulaT naqab ki nadida aaj diida sahi
hava-e-kucha-e-mahbub ka huun daman-gir
hazar daman-e-mahbub na-rasida sahi
tasavvurat tire husn se hain vabasta
ta.alluqat tiri zaat se kashida sahi
miri buland ḳhayali men kya kami aa.i
main arsh-zad nahin ḳhak-e-afrida sahi
mujhe nahin na sahi ho adu ko chain nasib
bashar ka dukh hai mujhe main bashar gazida sahi
jise mila hai use mast kar gaya ‘sahba’
mire ḳhayal ka bada-suḳhan kashida sahi
Leave a Reply