aftab-shakeel

Mausam-e-Hijr Mein Zakhmon Se Lada Rahta Hai

mausam-e-hijr men zakhmon se lada rahta hai

dil vo paudha ke jo patjhad men hara rahta hai

bas ye ik baat mujhe laati hai nazdik tire

tu bhi to meri tarah khud se khafa rahta hai

tabsira itna hi kaafi hai mohabbat ke liye

mukhtasar saude men nuqsan bada rahta hai

ham se behtar hai muqaddar men siyah patthar jo

ban ke surma tiri palkon se laga rahta hai

kya qasida tire rukhsar ke til ka yuun samajh

ik nagina hai anguthi men jada rahta hai

dar-o-divar sisakte hai kami par teri

ghar men khamoshi ka ik shor bapa rahta hai

us ki ankhen hai ya abad kuen hai ‘afi’

ab-e-gham jin men musalsal hi bhara rahta hai

More Poems

Leave a Comment