Jo Mariz Ishq Ke Hain Un Ko Shifa Hai Ki Nahin

jo mariz ishq ke hain un ko shifa hai ki nahin

ai tabib un ki bhi duniya men dava hai ki nahin

ḳhub-ru jitne hain aalam men jafakar hain sab

yaad kya janen unhen taur-e-vafa hai ki nahin

tang itna hai zamana ki chaman men gul tak

sub.h-dam chak-gareban hi saba hai ki nahin

miri be-tabi ke ahval ko shab ke us se

nama-bar tu ne zabani bhi kaha hai ki nahin

zulm hai ye to ki dil lijiye aur rahiye ḳhafa

kahin insaf zamane men raha hai ki nahin

shaiḳh kahte hain mujhe dair na ja ka.aba chal

barhaman kahte hain kyuun yaan bhi ḳhuda hai ki nahin

apne yaron men koi ja ke adam se na phira

kyuun ‘muhib’ un ki ḳhabar laani baja hai ki nahin